Day 1
台北 天氣預測12-15度 30%機會落雨
昨晚下了一晚的雨, 今早終於停了。仍有啲凍。
但街上還是濕的。
未食飽想整多碗粥，原來十二點至開。唉…
睇睇周圍都無嘢食嘅。唉…
回到旅館問店主希望佢地有胎pump。阿姨建議我可以下樓直行找機車店就可以打氣了。即時充滿希望就提着單車(車胎無氣推唔到呀…)就落樓去。補充一下住嘅旅館係要行一層樓的！唉…
行左幾條街順利見到幾間機車鋪，但，都未開門嘅。唉…
盲目地周圍轉，希望碰到開了門的單車或機車鋪。
途中看到有鋪頭有賣普通單車的也不顧一切的衝入去問老闆借pump。老闆非常好人的找出他的氣pump，但是是普通美嘴的並不合用。唉… 謝過老闆但他提供了非常重要的情報，說前面轉彎就有KHS專門店。又燃起生機，亦想起之前調查過西門町是有一家KHS店，是我準備回程時找他幫單車打包的。
多走幾步果然見到KHS招牌，過馬路去到店前，𠵱，裝修緊嘅！唉… (都無心情影相喇…)
問裝修師傅係咪賣單車的，佢指指隔離，唔通隔離至係？車…機車鋪黎之麻(下面相片間YSP店)！唉…
咦，再隔離間機車鋪有老細做緊嘢，唔理三七廿十一又衝入去請老闆幫忙充氣。老闆無精打采的望了我架摺車兩眼，拿了氣pump和些配件，問我要打幾多氣壓。我答八十磅，這才想起我忘記了應該帶法轉美嘴adapter！唉…
唔使幾秒，氣就打飽了。問老闆，佢重唔收我錢添！真係太感激了！！
就係中間的SYM店了。多謝老闆！！
可以踏喇！就係咁，我終於在台灣踏了第一程車回旅館。
都過左十二點了。好起程！行左幾步，先記得未影相，唉… 已經唔係零mileage。再reset又要set一大輪，唉…算了…
離開台北巿中心我不是按我逆時針的向南向桃園方向進發，而是向北的先向關渡橋出發。
因為回程最後從淡水區回台北前一定是先經過關渡橋的，所以衆多環島車友都會以關渡橋為始終點的。熱門的環島租車店 租車瘋 (http://tzuchefeng.myweb.hinet.net) 也是在關渡區附近的。
出發後的第一個＂景點＂ 關渡宮。想起連水都未買就連忙在旁邊的什貨店買了。店主阿姨非常健談，亦給予我行程上的第一個祝福！雨也停了，真是好的開始！
終於見到期待已久的關渡橋。
都已經二點多了，我還在台北！嘻，我就係時間多。一般有support車的環島團是九天，其他自由行車友大約十二至十五日。而我就預算了二十一日還有buffer。
好，隨著MP3傳來 Kraftwerk 嘅 Tour de France, 我亦正式開始環島的旅程。在橋上踏着也大叫了聲加油為自己打氣！
此為第二個起點。
出發後一直都未食lunch因為準備去環島聖地 蛙咖啡 (http://cafe.frogfree.com/bike/html/concept.html) 朝聖。記得 蛙咖啡 就位於 八里左岸單車徑 旁所以不假思索下了關渡橋就一直往前踏。踏了一輪也未見到蛙咖啡想想都是停下來查一下。原來蛙咖啡就在關渡橋底，我足足過了二公里多。
想過算了不去蛙咖啡但天冷冷附近乜都無相信前面更什。Lunch都未食，都是回頭吧。
好快回到關渡橋底但仍然見不到蛙咖啡。結果要問路人(居然是位來自香港長居的先生，他對單車旅遊好有興趣還跟我談了很久)才找到。
在蛙咖啡食了豐富的late lunch，寫下環島許願卡掛在店里，還買了個精美的 ＂環島中＂ 車牌，已經就四點，就再出發了。所以 蛙咖啡 算是我第三個起點。
順着八里左岸自行車道接上台15線。去到海岸線見到日落真係靚到點遲都要停落黎影相。
結果第一日就已經踏到入黑。重要係無定住宿連住邊都未知。唔通好似練乙錚一樣第一日要瞓廟?!
不過我一啲都無擔心，因在海岸線踏20km到轉左入台四線就可以到桃園。只不過是又由原來的西南方向倒回頭走東南方向。
雖然已黑齊仍然在路上但因為唔係多車亦所以唔覺危險。一進入市區就見到左手邊有間好Grand嘅酒店。心想大不了貴啲，梗有得住掛。再用Google Map 睇一輪發現附近住宿地方不多。一間中檔飯店居然full了。問了兩間汽車旅館就挑了間便宜啲的住下了。奇怪桃園為什麼住的地方這麼少，後來才知道我只是到了桃園邊上的蘆竹區，離開桃園市中心還有成七km。
住宿 貝克漢(Beckham!)汽車旅館 NT＄1680
今日行程 : 台北 - 關渡橋 - 八里左岸自行車道 - 台15線 - 台4線 -桃園蘆竹
今日里數 : 58.43km
總里數 ：58.43 km
